NASA ආයතනයේ යුරෝපා ක්ලිපර් (Europa Clipper) යානය ලබන වසරේ ඔක්තෝබර් 10 වැනි දා අභ්‍යවකාශගත කිරීමට සැලසුම් කෙරෙමින් පවතිනවා. බ්‍රහස්පතිගේ සාගර උපග්‍රහයා වන යුරෝපා මත ජීවයක් පැවතිය හැකි පරිසරයක් තත්ත්වයක් පවතී ද යන්න සොයා බැලීම එහි මූලික පරමාර්ථයයි.
ක්ලිපර් සමගින් අභ්‍යවකාශ ලෝලීන්ට තමන්ගේ නම ද යුරෝපා වෙත යැවිය හැකි ව්‍යාපෘතියක් NASA වෙතින් එළිදක්වා තිබෙනවා. මේ වන විට NASA වෙබ් අඩවිය ඔස්සේ ඒ සඳහා නම් 900,000ක් පමණ ලැබී ඇති බව සඳහන්. ඕනෑ ම අයෙකුට දෙසැම්බර් 31ට පෙර තමාගේ නම මේ සඳහා ඉදිරිපත් කළ හැකියි.
එසේ ම යුරෝපා ගැන ලියන ලද කවියක් ද ක්ලිපර් විසින් එහි රැගෙන යාමට නියමිතයි. In Praise of Mystery: A Poem for Europa යන හිසින් යුතු එය ඇමරිකානු ජාතික කිවිඳියක වන Ada Limón විසින් ලියනු ලැබ තිබෙනවා. එය ද එම වෙබ් අඩවිය ඔස්සේ රසවිඳිය හැකියි.
නියමිත දිනය වන විට රැස් වන නම් NASAහි ජෙට් ප්‍රචාලන විද්‍යාගාරයේ තාක්ෂණඥයන් විසින් ඉලෙක්ට්‍රෝන ධාරාවක ආධාරයෙන්, පසු ව යානයේ සවි කෙරෙන සිලිකන් මයික්‍රො චිපයක කාවැද්දීමට නියමිතයි. එසේ ලියැවෙන එක් පාඨමය පේළියක් කෙස් ගසකින් දහසකින් පංගුවක් තරම්, එනම් නැනෝමීටර 75ක ප්‍රමාණයෙන් යුතු වනු ඇති.
Message in a Bottle ලෙස නම් කර ඇති එම වැඩසටහනට මෙම සබැඳිය ඔස්සේ පිවිසීමෙන් ඔබටත් ලියාපදිංචි විය හැකියි.
NASA ඇසුරෙනි.
සෞන්දර්ය සෙනරත්
Post a Comment